बाणासुर संहार का संपूर्ण व्रतांत दोहों में....
द्वापरयुग रे माय, बाणासुर रागस भयों |
सोच तपस्या ताप, शिवजी रे सनमुख गयों ||
ध्यायों वो धूणी धणी, शिवजी प्रगट भया |
बोल्या मुख सु बोल, आज शिवजी प्रसन्न थया ||
माँगो मुख वर आज, जो मांगें वो देवसु |
आराधा री टेम, भेळो थारे रेवसुं ||
बोल्यों बाणासुर जाग, शिवजी म्हाने वर दिरावों |
मार सके न कोय, जग में अमर करावों ||
सुण सेवक म्हारी बात, आ हैं बात असम्भव |
इण संसारा आयने, मरणों हैं अटल थम्ब ||
तोहे वर में देवसुं, इच्छा पुरुला थारी |
इण धरती पर तुझ, मार सके केवल कन्या कुंवारी ||
वर दे भोलेनाथ, उठसु होया अलोप |
पापी अमरत्व समझ, कियो धरती पे कोप ||
साधू सन्त अर शूरमा, सब कोपण लागा |
देव डरे इक धाक, वे इंद्र लोक छोड़ भागा ||
छायों अंधियारों अजब, धरती डूबण लागि |
सूर्यवंशी क्षत्रियों रे, अब मन चिंता जागी ||
साधू-सन्त बुलाया, अब अब भेळा होया |
बाणासुर ने मारण खातिर, सब उपाय जोया ||
अटल बल अभिमानी रो, कुण कुंवारी हाथ गाले |
ज्यासु देव डरे इंदर धुजे, वो सर्प सु कम नही लागे ||
समझ न आई बात, क्षत्रिय एक सहारों पायों |
अम्ब भवानी जगदम्ब, कुलम्बा रो यज्ञ करायो ||
क्षत्री मिळ संसार रा, हवन माहि बैठा |
ध्यावे नित धणियाण, हठ पर होया ऐठा ||
आवों अम्बा आज, मैं बाळक थारा कहिजा |
बाणासुर अत्याचारी, दुःख सु मैं कळपिजा ||
माताय मनाई मैं सदा, संसार री तूँ जननी |
मैं कहिजा अंश थारा, तूँ सिर छतऱ धरणी ||
अब देवा थाने ओळबो, कईयाँ इति देर लगाई |
रोवे थारा बाळकां, किम आवाज नी सुणाई ||
सुण बाळो री करुण पुकार, अम्बा एड लगाई |
वा जगत जोगणी जगदम्बिका, यज्ञ कुंड प्रगटाई ||
आप लियो अवतार उमा, कन्या रे भेष में |
सुण सेवका पुकार, आई उणरे देश में ||
बोलो बाळक म्हारा, किम आवाज लगाई |
क्षत्री म्हारा लाल, इण रोवण ना सुहाई ||
धरती भार मैं सोपियों, थाने हैं मैं आय |
राजा-महाराजा बणाविया, लाल म्हारा कहाय ||
करुणा री हूँ सागर हूँ, सदा रहूँ सहाय |
वर माँगो जो देवसुं, सेवक मन म्हारे भाय ||
इतरों कहता शूरमा, मुखड़ो हैं खिलाय |
हे भवानी अम्बिका, मुक्ति बाणासुर सु दिलाय ||
इण पापी रो अंत करों, भूमि भार मिटाय |
सुर, संत सारा दुःखी, इण पापी रे आय ||
अम्बा मूळकी मावड़ी, रहो क्षत्रियों निश्चित |
इणने अब मैं मारस्यू, जासी भूमि भार मिट ||
इतरों कह उमा, कन्या रूप लीनो |
ब्राह्मण हो इक बांजियों, पालन-पोषण दीनों ||
ज्यूँ-ज्यूम दिन ढळता गया, राता बितण लागी |
अम्बा खेले आंगणे, शगति सुमत्त जागी ||
एक समय री वार्ता, सुणजो चित्त लगाय |
देवी होया अठार वर्ष, गाथा देवूं बतलाय ||
उमा अवतार ही अम्बिका, जग में ज्यारों चावों |
सुंदर मुख म्हारी मावड़ी रो, जग में छावों ||
एक दिन शिवजी आया, कहे सुणो देवी म्हारी बात |
आप अवत्र्या उमा अवतार, करस्या मैं विवाह थारे साथ ||
माता मन प्रसन्न थया, भरतार लेवण आयों |
आज्ञा सबा सु पायने, शिव-शक्ति ब्याव रचायों ||
मुहर्त ब्रह्मा जी देखने ने, बात बतळावण लागा |
सुणो शिवजी बात म्हारी, जोग जबर का जागा ||
शुभ नक्षत्र मायने, प्रभाता सु पेला |
शिव-शक्ति रो ब्याव रचाया, तोहिज सफल होवेला ||
इतरी सुणिया बात, मायड़ मंजूरी दिनी |
शिव-शक्ति रे ब्याव री, तैयारी अब कीनी ||
बिंद बणिया शिवजी, नांदिये चढ़ आया |
माता म्हारी अम्बिका रे, भरतार मन में भाया ||
नारद मन में सोचियों, ब्याव होवण लागा |
जो देवी नी चेतिया, जग जायेला अभागा ||
कुंकड बण करामत करि, बाराता बिच आय |
शिवजी अब हैं सोचियों, टेम चूकों जाय ||
शिवजी ले जान आपरी, पाछा कैलाश सिधाया |
माजी बांटा जोवता, शिवजी समय घणा लगाया ||
कोपी जग री जोगणी, वा प्रतिज्ञा एड़ी कीनी |
ब्रह्चारिणी रहूँ सदा, हाथ पाणी लिनी ||
देवी ले हिमाळया, तप करण लागा |
मुख मण्डल चमके जोर, ज्यूँ अम्बर री आभा ||
देवी रो सुण तेज, अधमी बाणासुर आयों |
जद देख्यों म्हारी मात ने, मन उणरो चकरायो ||
कह्यों बाणासुर सुण अम्बिका, ब्याव मा संग रचावो |
मैं स्वामी भू-लोक रो, पटराणी थाने बणावो ||
माजी कहे सुण मानवी, मैं हूँ ब्रह्मचारिणी |
नही करूँ किसी से ब्याव, आ प्रतिज्ञा हूँ तणी ||
मूरख बाणासुर मान्यो नही, करि अटल जिद्द |
देवी कहे जद परणस्यु, तूँ जीती जद द्वंद ||
राजी होय बाणासुर, देवी ने ललकारी |
जुध में हरा थने जोगमाया, पटराणी बनाऊँ म्हारी ||
माजी मन में सोचियों, मति मारी गई थारी |
टेम फोरो अब आवियों, संकट छायों भारी ||
फौजा सिणगारी शूरमे, आया जुध रे माय |
जाय ललकारी जुगत री, धणीयाणी धाय ||
मायड़ तो हाकल करि, सुणो आदेशों म्हारों |
रण चंडी रण आवजे, दुर्गा दैत्य संहारों ||
काळी खप्पर तूँ भरी, भैरव लाजे साथ |
खांडा खड़गावो खेत में, बाढ़ो इणरा माथ ||
जुध जोरको रण में भयो, फौजा भीड़गी सामी |
देवी तो सिंघड़े चढ्या, धर धूजण लागि ||
बाणासुर सामी आवियों, जाय बायण ललकारी |
ए कन्या तूँ युद्ध कर, हार होसी अब थारी ||
दोनु ही जुद्ध छेड़ीयो, रण भयंकर भारी |
तलवारा बिजळी टणके, माता धनुष-धारी ||
रण में देवी कोपिया, कियो बाणासुर संहार |
जय देवी जय देवी, भूमि तणो उतारियो भार ||
सुर-नर अर सन्त जन, फूल बरसावण लागा |
देवी आप देश पधारिया, भाग म्हारा जागा ||
पापी कपटी संहारियों, बाणासुर सो नाम |
तूँ बायण माँ कहावसी, कन्याकुमारी धाम ||
अलग-अलग समय रे मायने, देवी रूप अनेक धर्या |
भक्तों री भिड़ आय, बायण सेवका काम कर्या ||
माँ बायण री आराधना, देव असुर नर नारी |
जय जगदम्ब जय जग जननी, महिमा थारी भारी ||
माजी कह्यों मुख सूं, सुणो सेवका म्हारा |
जो नित नेम सु ध्यावसी, वे सब म्हाने प्यारा ||
आठम अर शुक्रवार ने, मैं लेस्यु नित धुप |
म्हारी सेवना नित करि, मेवाड़ी महाभूप ||
पैलो अवतरण ओ धर्यो, दूजो दुवाजुग माय |
पांडवो री आराधना, बणसू वरदायिनी माय ||
तीजो कळजुग रे मायने, गढ़ चित्तौड़ होसी धाम |
बण सिसोदिया री कुळ देवी, सारूँ सबरा काम ||
चार भुजाळी मैं हिज हूँ, हंसा री आरूढ़ |
सिंह भैंसों म्हारे सोवणो, चावों चारो खुट ||
चार भुजा धारण करि, हाथा धनुष-बाण |
जो कोई ध्यावे प्रेम सु, देवूं खुशियां खाण ||
अष्ट भुजा सिंघड़े चढू, भैंसे असवारी भुज बीस |
सेवक शरणे आविया, नित नवावे सीस ||
एक अवतरण म्हारो और हैं, मार्या असुर हजार |
ब्रह्मा जी सु प्रगट भई, किया दैत्य संहार ||
इतरो कह अम्बिका, समदर जाय समाणी |
दक्षिण ज्यारों विराजणो, कान्या कुमारी केवाणी ||
इतरो कह्यों मातेशरी, जग सु होया अलोप |
दक्षिण जाय बिराजिया, दीनों खुटों रोप ||
दक्षिण कन्या कुमारी, गुजरात माताय ब्रह्माणी |
चित्तौड़ बायण केह रह्या, माता जग री धनियाणी ||
माँ बायण री महिमा रो, पायो कोनी पार |
नतमस्तक शरणे खड़ा, विनवो बारम्बार ||
अनु अरज आजै करि, सुण चित्तौड़ गढ़ राय |
चरणें राखों भक्ति आपो, विणती सुणो मम माय ||
हिये हमेशा रेवजो, अनु चरणा रो ध्यान धरे |
घट-घट अनु रे बिराजिया, देवी सबरो कल्याण करें ||
चित्तौड़गढ़ दुःख मेटणो, सदा ही बरसै सुख |
दिन उगता दर्शन करूँ, माँ बायण रो मुख ||
-------जय श्री बाण माताजी-------
विशेष नोट:- इन दोहों में किसी भी प्रकार की केकांट-चाँट न करें....
आज्ञा से :- श्री बाण माताजी भक्त मण्डल जोधपुर
